فكرة مشروع الافراح الجماعيه

بسم الله الرحمن الرحيم

السلام عليكم و رحمة الله و بركاتة

و الصلاة و السلام على سيدنا محمد عليه افضل الصلاة و ازكى التسليم

فكرة مشروع الافراح الخيريه

اولا انا عاوز اقول ان المشروع بتاع النهردة من المشاريع الكبيره اللى انا كنت بفكر فيها زى مشروع إرم للمساعدات الطبيه و مشروع مهرجان الخير بالجامعات بس انا حابب اقوله ممكن ربنا يكرم و يتحقق اللهم امين

المشروع دا و بأختصار هو ان احنا نعمل افراح خيريه للناس الفقرا حوالى 25 راجل و ستاتهم عشان نفرحهم و ندخل السرور على قلوبهم عن طريق فرح مجمع يكون فى استاد او مكان مفتوح يتعمل فيها الفرح 

طبعا حاجة زى كدا عاوزه سبونسر ( راعى مادى ) عشان يساعد فى الموضوع دا لانه مكلف شويه بس بجد لو دورنا هنلاقى سبونسر بمنتهى السهوله لان الموضوع كله ممكن يتكلف حوالى من 35 الف لـ 40 الف جنية فى ناس كتير هتحسب ان المبلغ دا كتير بس لو فكرتوا هتلاقوا ان اقل فرح فى الشرقيه دلوقتى فى قاعه كويسه بيتكلف حوالى 16 الف جنيه يعنى احنا ممكن نفرح 25 زوج بتمن فرحين و نص من اللى بيتعملوا دول دا على اساس ان كل زوج ليه 100 ضيف و ليهم جاتوه و مشروب غازى و طبعا مستلزمات الفرح السوند سيستم و الإضاءة و الفراشه و مبلغ رمزى للازواج , يعنى شوف كميه الحاجات الخيريه اللى هتحصل ادخال سرور على مسلم و مساعدة فى ستر مسلمين و حاجات تانيه كتير فالموضوع مش صعب بس عاوز ناس و رجاله تشتغل فيه عشان يحصل و صعب شويه واحد ولا اتنين يشتغلوا بس مش مستحيل 

فى حاجة مهمه عاوز انبه ليها ان احنا مش بعد ما نعمل الخير دا كله نضيعه بان الفرح ميكونش اسلامى و يكون مسخره .......انا عارف ان فى ناس كتير و هى بتقرى الموضوع ان الفرح يبقى اسلامى هتستصعب الموضوع بس صدقونى الموضوع دا سهل جدا , الفرح الاسلامى بجد بيبقى احسن و أبرك من اى فرح تانى كفايه اننا مبنغضبش ربنا اظن دى كفايه خالص 

نصحتى النهردة زى ما قال الشيخ محمد العريفى فى مقطع انشاد له ( لا تحقرن من الامور صغارها  ... فالقطر منه تدفق الخلجان ) معناها متستصغارش حاجة سواء خير او شر هى فى الانشاد كان معناها على الذنوب بس انا قصدى على الحاجات الكويسه عشان ممكن حاجة صغيره كويسه تبقى سبب انها تهديك او تهدى حد تانى و تاخد ثوابه او تبقى سبب دخلولك الجنه 

و فى الاخر و كالعادة اخلص النيه لله وحده و صلى على النبى 10  مرات الصلاة الإبراهميه ( الجزء التانى من التشهد ) و ادعولى و انشروا البلوج لعل الله يدخلنا بيه الجنه 

و صلى اللهم و سلم على سيدنا محمد و على اله و صحبه اجمعين

و السلام مسك الختام

السلام عليكم و رحمة الله وبركاته

 

فكرة مشروع احياء سنه السواك

بسم الله الرحمن الرحيم

السلام عليكم و رحمة الله و بركاتة

الصلاه و السلام على سيدنا محمد عليه افضل الله و ازكى التسليم

فكرة مشروع النهردة هى

احياء سنه السواك اللى بقت مختفيه الايام دى و هى عن طريق توزيع عدد من السواك على المساجد للمصلين لاستخدامها قبل الصلاه و تاخد ثواب عليها

متنساش او متنسيش ان الرسول قال فى حديث بما معناه لولا اشق على امتى لأمرتهم بالسواك عند كل صلاه معنى كدا انه مهم جدا

على فكرة الموضوع اسهل مما يمكن انا كنت بظبط ان شاء الله انى اعمل الموضوع دا على نطاق واسع انى انا و صحابى نجمع و نشترى سواك من اى حد نازل من السعوديه انا فاكر انى كنت بشترى الرزمه ما بين ( 10 - 20 ) سواك بـ 5 ريال سعودى يعنى 7.5 جنيه بعنى ولا حاجة انا عن نفسى ان شاء الله هظبط انى اشترى مبدأيا 10 رزم و اوزعهم على 10 مساجد للمصلين يعنى على الاقل هيحيى سنه السواك مع 100 فرد بإذن الله تعالى و الموضوع سهل جدا بس محتاج المبادره و الشعل بس

يلا كلنا ناخد خطوه و نعملها ابتغاء وجه الله تعالى

كالعادة خلى نيتك لله وحده و صلى على النبى 10 مرات الصلاه الابراهميه ( الجزء التانى من التشهد ) و ادعيلى 

و السلام مسك الختام 

السلام عليكم و رحمة الله و بركاتة

فكرة مشروع شجرة الصلاة

بسم الله الرحمن الرحيم

السلام عليكم و رحمة الله و بركاتة

و الصلاة و السلام على سيدنا محمد عليه افضل الصلاة و ازكى التسليم

فكرة مشروع دا هى شجرة الصلاة

فكرة المشروع دا للأطفال و الشباب و هى بأختصار شجره الصلاة بتعرفنا احنا صلينا قد ايه و سيبنا صلاة قد ايه و يا ترى احنا مواظبين على الصلاة ولا لأ 

خلينا نشوف ازاى الموضوع دا 

دى صورة لشجرة الصلاه و هى عباره عن

اربع فروع كبيره و دى نقصد بيها الاسابيع اللى فى الشهر

و الفروع الكبيره فيها سبع غصون صغيره و هى ايام الاسبوع

و الغصون فيها خمس ورقات و دى صلاوات اليوم

و فى فى الاخر ثمرة و دى اى حاجة كويسه عملناها فى اليوم من بر والدين و صله رحم او نوافل 

و طبعا هتسألوا ليه التلت غصون اللى تحت دول هقلقوا ان الشهر 30 او 31 يوم 

احنا بقى لما الطفل بيصلى صلاه حاضر و جماعه بنخليه يلون ورقه الشجر باللون الاخضر و لو كانت صلاة فائته نخليه يلونها باللون الاصفرو الثمرة زى ما قولنا قبل كدا لو عمل حاجة كويسه زى ( بر والدين او صله رحم او نوافل )  و ياريت لو الطفل هو اللى لون الشجره بنفسه عشان يتحمس و يحس انه عمل حاجة بنفسه 

الموضوع سهل جدا و طباعته سهله بردو انا انصح بطباعته على ورقه ايه ثرى مش ايه فور لانها هتبقى اكبر و اوضح و احسن للطفل او الشاب و ممكن تتلزق على الحيطه او الدولاب 

على فكرة موضوع الشجره دا قديم بس انا حبيت انوه له لانه بالنسبه للصغار حاجة حماسية

نصيحه النهردة لو انت عندك مقدره اطبع كميه كبيره منها و حطها فى المسجد تاخد ثواب كل من استفاد من الورقه دى و ممكن تكون سبب دخولك الجنه

و متنسوش كالعاده خلى النيه لله وحده و صلو على النيى 10 مرات الصلاة الابراهيميه ( اللى هى الجزء التانى من التشهد ) و اشوفكوا فى المشروع اللى جاى 

و السلام مسك الختام

السلام عليكم و رحمة الله و بركاتة

فكرة مشروع تجميل المساجد

بسم الله الرحمن الرحيم

السلام عليكم و رحمة الله و بركاتة

اللهم صلى و سلم و بارك على اشرف الانبياء و ازكى المرسلين

فكرة مشروع النهردة مقسمه الى كذا محور و انا عن نفسى مبحبش اتكلم بطريقه نظريه فى شرح الفكره 

ملخص الفكره ان انا عاوز احسن من شكل المسجد دا عن طريق كذا حاجة 

اولا : تعطير المسجد

موضوع التعطير دا الثواب فيه كبير ما شاء الله لان بجد احيانا كتير الواحد بيصلى و هو ساجد بيشم ريحه كريهه فى الارض من قله ما الارض اتنظفت 

الموضوع كله بنتكلم فى حوالى 20 ولا 25 جنيه بالكتير ( دا يكفى لحوالى شهرين او تلاته ) بتنزل عند اى واحد بتاع عطور و بتجيب العطر اللى انت عاوزه مركز , افتكر ان كان الملى منه مركز بحوالى ربع جنيه و بعدين بيتحط فى ازايز رشاشه و يتزود ميه او سبرتو ابيض على حسب نوع السجاد و ياريت يبقى النسبه بنهم على الاقل ربع للعطر و تلت ارباع للسبرتو او للميه عشان الريحه تثبت شويه على السجاد

ثانيا :كنس المسجد و تنظيف اماكن الوضوء

كتير منكوا هيقول ان الموضوع دا صعب و ممكن يبقى مستحيل بس بجد افتكروا ان اجره عظيم كل اللى عليك تعمله انك تكنس المسجد و الموضوع دا مش محتاج جهد مره فى اليوم او كل يومين و تقسم الاسبوع بينك و بين اصحابك و تمسح المكان اللى الناس بتتوضى فيه عشان لو فيه اى نجاسه تاخد اجر طهور المكان و تنظيف مسجد و متنساش المرأه اللى كانت بتنظف المسجد ايام الرسول و الرسول صلى عليها مخصوص فى وفاتها و على فكره انا جربت الموضوع دا و اقسم بالله بحس انه ممتع جدا لان بحس ان ربنا بيبقى مبسوط ساعتها و افتكروا حاجة ضروريه جدا أنصحوا صحابكوا و الناس الصغيره بكدا عشان تاخدوا ثوابهم

ثالثا : دهان جدران المسجد - دا حاجة زياده و مش ضروريه فى بعض الاحيان

يعنى ممكن انت و اصحابك تجمعوا من بعض و تجيبوا دهان مش غالى اوى و تدهنوا المسجد بعد صلاة العشاء و مش هيكلف خالص ممكن لو انتوا 10 كل واحد يدفع 20 جنيه و تدهنو المسجد من اوله لاخره  وياريت لو كان دا بأديكوا مش حد يجى يدهنه

انا بحب فى نهايه كل موضوع اكتب كلمه !! كلمه النهرده اللى عاوز اقولها ان كل ما تعملوا حاجة زى دى انتو و اصحابكوا صوروها بكاميرا موبايل او ديجيتال الموضوع دا هيبان عادى ساعتها بس والله لما تتفرجوا عليها بعديها بسنه او 2 او بزمن هتفتخروا انكوا عملتوا الحاجات دى مع بعض و كالعاده متنسوش انكوا تعملوا الموضوع دا خالص لوجه الله تعالى و ادعولى

و السلام مسك الختام 

السلام عليكم و رحمة الله و بركاتة

فكرة مشروع استيك الخير

بسم الله الرحمن الرحيم 

السلام عليكم و رحمة الله و بركاتة 

فكره مشروع استيك الخير

بأختصار شديد فكره المشروع النهردة للصغار بس و هى عباره عن ان انتا بتعلم ولادك كل يوم يعملوا حاجة كويسه و كل ما يعملوا حاجه كويسه زى ( صلاة - تسبيح - بر والدين -.... )  يحطوا استيك فى اديهم او يربطوا خيط حاولين اديهم و لو عملوا حاجة وحشه ( شتموا - كذبوا - مسمعش الكلام - .... )  يشيلوا الاساتك كلها و يبدأوا من الاول تانى لحد اخر اليوم و طبعا بتكون متفق معاهم على كل استيك مبلغ رمزى من الفلوس عشان تحمسهم يدنهم شغالين على الموضوع دا و بجد بتفيد على المدى البعيد

انا بمنتهى الصراحه اعتقد ان الموضوع دا بينفع جدا مع الضغار لانى لما فكرت فى الموضوع دا و حطيت نفسى مكانهم ( الاطفال )  لقيت انها حاجة كويسه جدا و بتفرح الاطفال و لقتيها انها بتساعد جدا فى تربيهم و تصور او تصورى لو الفكره دى بدأت من سن سنتين شوفوا بقى هيتعودا عليها ازاى 

اهم حاجة زى ما الشيخ العريفى قال ان احنا نهتم بحاجه اسمها ( ج - م - م ) ودى اختصارات لتلت حاجات هم الجرأه و المبادره و المواصله 

يعنى مش مع الوقت الحماس و المواصله تقل لانها ممكن تنقلب بالضد على الكبار 

و ارجو من الله تعالى ان اكون افدتكم بالفكره 

ااااااااااه نسيت ...........طبعا متنسوش النيه لوجه الله تعالى و ادعولـــــى

 

و السلام مسك الختام 

و السلام عليكم و رحمة الله و بركاته

فكره مشروع افطار الشوارع

بسم الله الرحمن الرحيم 

السلام عليكم و رحمة الله و بركاتة

فكرة مشروع افطار الشوارع 

ملخص الفكره ان احنا بنحاول ناخد ثواب افطار صائم عن طريق توزيع كياس بلح و كياس مياه على الناس الصايمه فى الشوارع قبل الفطار بحوالى ربع ساعه 

الحمد لله رب العالمين انا و الفريق اللى معايا ربنا كرمنا رمضان دا بتوزيع حوالى 2500 كيس بلح و كياس ميه على الناس اللى فى الشارع 

كانت بدايه فكره المشروع تمويل من اهل الشارع لينا بان احنا عدينا على المنازل و لمينا فلوس طبعا و كالعادة الموضوع بيبقى صعب شويه فى الاول انا مش بقول كدا عشان ازكى من نفسى انا بقول كدا عشان لو حد عمل الموضوع دا ميزهقش بسرعه و يقول مفيش فايده

بعدها ربنا كرمنا و جينا حوالى 225 جنيه على وقفه رمضان و سبحان الله كفونا طول رمضان نزلنا و جبنا يوميها 5 كيلو بلح و كياس تعبيه البلح من عند عطار اللى هى الكياس الصغيره اللى تاخد 3 بلحات

والله يا جماعه بعد ما اشتغلنا فى المشروع دا كانت بتيجى التبرعات لحد عندنا من عند ربنا سبحانه و تعالى دا زياده على ال225 جنيه اللى فى الاول فأخلصوا النيه لربنا و ربنا ان شاء هيكرمكوا جدا 

مش عاوز اقلكوا قد ايه كانت متعه بالنسبه لينا ( الفريق )  ان احنا نقعد على الارض و نفرش و نعبى و نكيس و ندبس كياس البلح و نهزر و نتكلم جد و كنا الحمد لله رب العالمين بنعمل 5 كيلو بلح كل يومين لغايه يوم 12 رمضان تقريبا و بعدها عملنا 5 كيلو بلح فى اليوم و دا كان كرم و نعمه و فضل و رعايه من الله 

يا جماعه الحاجات دى بجد بتحتاج فريق او ناس تشتغل مع بعض و انا فريقى كله صغيرين يعنى ما بين 11 و 17 سنه و الناس الصغيره دى بجد بتحب تعمل الحاجات دى اوى فمتستهونوش بسنهم خالص و حاولو معاهم عشان ربنا يكرهم و تاخدوا ثوابهم لو عملوا الحاجات دى بعد كدا عشان الدال على خير كفاعله

و السلام مسك الختام 

السلام عليكم و رحمة الله و بركاتة 

فكرة مشروع الطبق الواحد

بسم الله الرحمن الرحيم 

السلام عليكم و رحمة الله و بركاتة

انا اولا عاوز انوه ان فكره المشروع دا مش فكرتى و انها فكره واحده من فريق صناع الحياه بأبو كبير

فكرة مشروع الطبق

الفكرة دى متنفعش تتعمل الا فى رمضان  بس

ملخص الفكره ان كل بيت فى رمضان ما شاء الله لا قوه الا بالله بيعمل اكل كتير فى رمضان فمفيش مشكله لو كل بيت طلع طبق كل يوم لانه مش هيخسر حاجة و من افطر صائم كان له مثل اجره

احنا الحمد لله رب العالمين عملنا المشروع دا فى اكتر من شارع و ربنا كرمنا بفضل منه و رعياته فى اخر 10 ايام فى رمضان بان احنا جمعنا حوالى 430 طبق و والله كان فى ناس بتتبرع بـ10 أطبق فى اليوم و ناس كانت بتتبرع بـ6 فى اليوم  و كنا بنوزع الاطباق دى فى استقبال المستشفيات ( قسم الطوارئ ) لان الناس دى مبتكونش عامله حسابها فى ان حاجة زى دى ممكن تحصل قبل الفطار

 

شوف بقى كميه الدعوه اللى بتجيلك من الناس دى و فرحتهم و ثواب افطار الصائم

الموضوع دا اشتغل فيه ناس كتيره فى فريقنا و اتبسطوا جدا زياده على ان الناس اللى احنا بنجمع الاطباق منهم من الشارع عندنا قالوا لينا انهم عاوزين ان شاء الله رمضان الجاى ان  احنا نعمله الشهر كله مش اخر 10 ايام بس و الحمد لله رب العالمين على كل شئ !!

نصيحه خلوا الناس اللى بتلف على المنازل عشان تتفق معاهم على المشروع دا يكونوا بيعرفوا يتكلموا جدا عشان دا هيفيد جدا فى جذب الناس للمشروع

 بجد عاوز اقول لكم خدوا خطوه و عمركوا ما تيأسوا و ربنا هيبقى معاكوا و هيساعدكوا بطرق انتوا مش عارفنها

و متنسوش اهم حاجة فى المشاريع دى كلها النيه الخالصه لوجه الله تعالى 

و السلام مسك الختام 

السلام عليكم و رحمة الله و بركاتة

فكره أطباق الخير

بسم الله الرحمن الرحيم

فكره طبق الخير

انه ان احنا بنحدد يوم لطبق الخير و بنجمع فلوس من بعضنا و بنجيب اكل و اللى عاوز يساعد بيساعد بأكل من بيته و بنبعت ناس تشترى اكل بطريقه قائمه الاسعار يعنى اقل سعر و احسن نوعية و بنحطة فى اطباق و بنبيعه و العائد منه بيروح لحاجات خيريه .

الفكره دى مش جديده بس بجد انا من وحهة نظرى المتواضعه انها فكره ممتازه جدا لاننا اخر مره جربناها كنا داخلين بحوالى 400 جنيه و فى اخر اليوم ربنا كرمنا و كان معانا فوق الـ1000 جنيه بفضل ربنا و كرمه و رعايته و كان العائد دا لمستشفى الاورام

الموضوع سهل جدا بس عاوز ناس تشتغل فيه و يفضل الموضوع دا يكون فى الجامعات لان دى اسهل حاجه من ناحية الدعايه و التجمعات و سهوله البيع 

لازم تراعوا حاجه و انتوا بتحاولوا تبيعوا انكوا تكونوا فى اكتر منطقه حيويه فى الجامعه او اى حته هتعملوا عليها الطبق دا زى المداخل و المناطق اللى الناس بتتواجد فيها بشكل كبير و قدام قاعات المحاضرات  

نصيحه ابعدوا و انتوا بتبيعوا الحاجات دى عن اى واحد بيبيع لسبب تجارى عشان ميبقاش فيها حساسيه او ضرر مباشر له

كل اللى ممكن تحتاجوه هو فلوس الدعايه و بيبقى على نص ورقه ايه فور يعنى ممكن تعملوا 1000 ورقه دعايه بحوالى 9 جنية بس !

و السلام مسك الختام و ارجو من الله ان اكون افدتكم بفكرة المشروع الخيرى دا 

والسلام عليكم و رحمة الله و بركاتة

مهرجان الخير بالجامعات

بسم الله الرحمن الرحيم

فكرة المهرجان :

 هى إقامة مهرجان لمدة اسبوع الهدف منه المساعدة فى عمل الخير عبر التبرع بالدم و اطباق الخير و مارثون خيرى داخل الحرم الجامعى .

 *عدد طلاب جامعة الزقازيق 110 ألف طالب غير أعضاء هيئة التدريس  *

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

أهداف المهرجان :

1)      التبرع بالدم :

 تحصيل على الاقل 1500 قربة خلال المهرجان لمرضى السرطان و الفشل الكلوى و حوادث الطرق .

2)      طبق الخير :

 العائد منه يخصص لمستشفى أورام الجامعة .

3)      المارثون الخيرى :

 التعريف بالمهرجان و زيادة الوعى لدى الطلاب و الحصول على متطوعين فى السنوات المقبلة .

4)      عمل الخير و تفعيل دور العمل التطوعى الخيرى .

5)      تحمل المسؤوليه لدى الشباب .

6)      تفعيل أنشطة الجامعة .ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

خطة سير عمل المهرجان :

ينقسم المهرجان الى قسمين ( الأسبوع الاول – الأسبوع الثانى ) .

الاسبوع الاول هو مجرد دعاية للمهرجان عبر :

1) الدعاية الالكترونية :

- عبر منتديات الجامعات .

- عبر الفيس بوك و المجموعات البريدية .

- عبر المنتديات الخاصة بمحافظة الشرقية مثل ( منتدى كوابرية ) .

2 ) الدعاية الورقية : عبر الفلايرز و البوسترز و البرشورز .

3 ) الدعاية الجماعية : التنبية و التنوية عن المهرجان فى المدرجات .

4 ) الدعاية الفردية : عبر الاصدقاء و ما بينهم .

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

الاسبوع الثانى هو اسبوع فعاليات المهرجان :-

1 ) ابتدا من المارثون يوم السبت 11 صباحا .

2) اماكن التبرع بالدم على مدار ما يقارب 6 ساعات يوميا و لمدة السبوع .

3) عدد الكليات هى 16 كليه و تقسم الى 4 كليات يوميا لأطباق الخير غير ان الكليات الحيويه مثل تجارة و حقوق و اداب و تربيه سيستلزم لها يومين لاطباق الخير .

بنوك  الدم المتعامل معها :

1 ) بنك الدم القديم .

2 ) بنك دم الجامعة .

3  ) بنك دم مستشفى الاحرار .

* عدد سيارات التبرع المشاركة هى 4 سيارات غير الخيام  2 للمستشفى القديم وواحدة لكل من الجامعة و الاحرار *

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

الاستفادة العامة من المهرجان :

المستفاد منه	قدرة بالجنيه المصرى
1500 قربة دم .	120 جنيه تمن القربه * 1500 متبرع = 180 الف جنية .
10% نسبة الجهة الداعمة من القرب .	150 قربه * 120 تمن القربه = 18 الف جنية .
10 الاف جنية طبق الخير .	الناتج عنه 30 الف جنية على نهج الاطباق السابقه .
دعاية ( لوجو المعرض و اسم الجمعية على كل ما يلى )	- 50 الف فلاير . - 500 بوستر ملون . - دعايه على منتديات الجامعه و الخاصه بالشرقية . - بنر ( 4*5 ) .                        - مجلة الجامعه . - تغطية اعلامية ( جرائد مشهورة – قنوات فضائية ) .

الأحتياجات ( المبدأية ) :

1 ) طباعة 50000 فلاير و 500 بوستر ملون و اى دى للتعريف بالمنظمين و شهدات التقدير .

2 )  طباعة بنر .

3 ) لوحات قماش للتعريف بالمهرجان .

4 ) حوالى 250 تيشرت ( 100 تيشرت للمنظمين – 150 تيشرت للمتسابقين فى المارثون ) على ان يكون تيشرت المنظيمن بلون مختلف عن المتسابقين فى المارثون .

5 ) خيام بسيطة لدى كل جامعه للتبرع بالدم و بيع اطباق الخير .

6 ) متطلبات طبق الخير من ( مأكولات – مشروبات – طباق فل – اكواب – تغليف ) .

7 ) خيمة كبيرة لإدارة المهرجان .

8 ) عبوات عصير للمتبرعين فى اماكن التبرع بالدم .

و فى النهاية نرجو من الله أن تكون الفكرة قد نالت اهتمامكم و لكم منا جزيل الشكر ,,,,,

و السلام عليكم و رحمة الله و بركاتة .

فكرة مشروع إرم للمساعدات الطبيه

فكرة المؤسسة :

هي مقر واتحاد عدد كبير من الجمعيات الأهلية في الجمهورية وهدفها هو تعزيز العلاقات بين الجمعيات في المجال الطبي وزيادة الكفاءات حيث ستتبادل الجمعيات ثقافتها في العمل التطوعي الطبي وسوف تستفيد الجمعيات من المؤسسة لدعمها الكامل في القوافل وتحمل تكاليف التوعية وستنشر التوعية بطريقه متوازية في القرى حيث سننشر التوعية على اكبر شريحة قرى ستكون هذه المؤسسة الأولى والفريدة من نوعها في الجمهورية بإذن الله .

ـــــــــــــــــــــــــــــــــــــــــــــــــــــ

سبب تسمية المؤسسة بإرم هو :

قال الله تعالى ( ألمْ ترَ كيفَ فعلَ ربُكَ بعاد ، إرمَ ذاتِ العماد ، التي لم يُخْلَقْ مثلُها في البلاد ) .

علم أن مدينة إرم لم يخلق مثلها في البلاد و بما أن المؤسسة هي الأولى و فأرجوا من الله أن تكون الفريدة من نوعها و أن تكون سبب في نهضة طبية ولو كانت طفيفة و الله المستعان .

الاهداف:

1 ) رضا الله عز وجل عن طريق جعل هذا العمل خالصا لوجهه الكريم .

2 ) اتحاد حوالي 60 جمعية لتبادل المعارف والخبرات الطبية وزيادة الكفاءات .

3 ) تنظيم 250 قافلة سنويا وذلك عن طريق تنظيم 4 قوافل لكل جمعية وتهدف هذه القوافل إلى علاج ما يقارب 88000 مريض مع العلم أن المؤسسة ستوفر أجهزة ضغط وسكر ومعامل تحاليل .

4 ) إنشاء حساب في بنك الدم عن طريق التنسيق ما بين المؤسسة ووزارة الصحة على أن تأخذ المؤسسة حصة من مجموع القرب المتبرع بها في حملات التجميع .

4 ) توعية مالا يقل عن 2000 قرية لمرض معين بنظام النصف سنوي ويهدف التوعية إلى توعية قرابة 100000شخص عبر المتطوعين وسيتم تدريب المتطوعين في مقر المؤسسة .

5 ) تدريب أوائل كليات التمريض عن طريق توفير خبراء أجانب وأساتذة من كليات التمريض بوسائل متطورة .

6 ) بما أن المؤسسة مشتركة مع 60 جمعية فستعمل المؤسسة على تدريب بعض المتطوعين على التعامل مع الكوارث مما يعني توفير قوى بشرية في الظروف الطارئة مثل (الدويقة – مسرح بني سويف) .

                           

7 )  توفير حوالي 500 فرصة عمل عبر توفير فرص عمل داخل المؤسسة مثل (إداريين – صيادلة – محاسبين – موظفين ) وتوفير فرص عمل لأعضاء التوعية بإعطائهم مبلغ من المال لكل مهمة لضمان الجدية .

8 )  حملات توعية داخل المدارس والجامعات للتوعية ضد التدخين والإدمان وضد أمراض العصر وسبل مكافحتها وتوعيتهم ضد أي عادة أو تقليد خاطئ .

9 )  إنشاء معمل لتصنيع الدواء داخل المؤسسة تحت مراقبة أساتذة من كليات الصيدلة وصيادلة ومسئول من وزارة الصحة وسبب إنشاء هذا المعمل هو التقليل من ميزانية الدواء .

10 )  صنع شباب مسئول وناضج على العمل والتعامل داخل المؤسسة مع هيئات خارجية .

الجهات المتعامل معها  :

1 -  وزارة الصحة :

توفير الدعم و رعاية التوعية .

ـــــــــــــــــــــــــــــــــــــــــــــــــــــ

2- الهلال الأحمر:

تسهيل التصاريح و الموافقات الأمنية .

ـــــــــــــــــــــــــــــــــــــــــــــــــــــ

3- نقابة الأطباء :

التنسيق معها في الحالات الطارقة الداخلية و الخارجية .

ـــــــــــــــــــــــــــــــــــــــــــــــــــــ

4- اليونيسيف  :

إعطاء مصداقية للمؤسسة  .

تبادل المعارف بين المؤسسة و مؤسسات أخرى عن طريق المؤتمرات .

ـــــــــــــــــــــــــــــــــــــــــــــــــــــ

45- منظمة الصحة العالمية WHO :

زيادة المصداقية و القيام بالمساعدة و الرعاية في حملات التوعية .

ـــــــــــــــــــــــــــــــــــــــــــــــــــــ

6- وزارة التربية و التعليم :

استخراج تصاريح للتوعية داخل المدارس و الجامعات .

تدريب أوائل كليه التمريض .

ـــــــــــــــــــــــــــــــــــــــــــــــــــــ

7- وزارة القوى العاملة :

مساهمتها في توفير فرص العمل .

ـــــــــــــــــــــــــــــــــــــــــــــــــــــ

8- وزارة الشؤون الاجتماعية  :

تيسير عمل الجمعيات و استخراج التصاريح الفورية .

9- شركات الدواء :

توفير الدواء اللازم الخاصة بالأدوية .

ـــــــــــــــــــــــــــــــــــــــــــــــــــــ

10- مراكز التأهيل :

المساعدة في حالات الإدمان .

المساعدة في الكوارث الطارئة مثل التأهيل النفسي . 

ـــــــــــــــــــــــــــــــــــــــــــــــــــــ

س /  ما استفادة هذه الهيئات منا و سبب تعملها معنا ؟ :

ج /  ترويج و نشر إعلانات لها عبر القوافل و داخل المؤسسة .

ـــــــــــــــــــــــــــــــــــــــــــــــــــــــــــــــــــــــــــــــ

س / ما سبب تعاملنا مع هذا العدد الكبير من الهيئات ؟ :

ج / السبب في التعامل مع هذا العدد الكبير من الهيئات الحكومية و الدولية هي زيادة المصداقية و الثقة عند الناس .

ـــــــــــــــــــــــــــــــــــــــــــــــــــــــــــــــــــــــــــــــ

س / ما هي مصادر التبرعات ؟ :

ج /

أولا :-

المنح المقدمة من الهيئات التالية عند إثبات كفاءتنا :

* وزارة التربية و التعليم .

* وزارة القوى العاملة .

* اليونيسيف .

* منظمة الصحة الدولية WHO .

ثانيا :-

* عن طريق التبرعات المادية بطريقه الاستوك و هو عبارة عن دفع تمن علبه من كل تخصص دوائي .

ـــــــــــــــــــــــــــــــــــــــــــــــــــــــــــــــــــــــــــــــ

س / ما هي المشاكل التي قد تأخر أو تأجل اى قافلة و سيتم حلها عبر المؤسسة بإذن الله  ؟

ج /

1 )  التصاريح :- أحيانا ما يصعب على بعض الجمعيات توفير التصاريح الأمنية أو التصاريح من التربية والتعليم .

2 )  توفير الأدوية :- غالبا ما تحتاج القوافل إلى كميات كبيرة من الأدوية مما يصعب بعض الأحيان توفيرها ويؤدي إلى تأجيل القوافل

ـــــــــــــــــــــــــــــــــــــــــــــــــــــــــــــــــــــــــــــــ

.

أهم المشاريع التي ستهتم بها المؤسسة :

قوافل  –  بنك الدم  –  توعية  -  معارض --  مركز ابحاث

1 - قوافل:-

توفير 250 قافلة سنوياً لكل جمعية 4 قوافل سنويا و هدفها هو علاج قرابة 88000 مريض فقير مع توفير الأدوية والتصاريح اللازمة وتوفير معامل التحاليل وأجهزة الضغط والسكر .

ـــــــــــــــــــــــــــــــــــــــــــــــــــــــــــــــــــــــــــــــ

2 - بنك الدم :-

الاشتراك مع وزارة الصحة لتوفير سيارات بنك الدم على أن يأخذ البنك نسبة من عمليات تحصيل التبرعات و سيتم تعيين منسق مع وزارة الصحة لمراجعه النسب .

ـــــــــــــــــــــــــــــــــــــــــــــــــــــــــــــــــــــــــــــــ

 3 - التوعية :-

توفير التدريب للمتطوعين وتدريبهم على مهارات الاتصال و أساليب التعامل و ستتركز التوعية على أهم المواقع الحيوية كالمساجد والمستشفيات والمصالح الحكومية والتجمعات على ان توفر المؤسسة الفلايرز والبرشورات وستوفر مبلغ مادي لضمان الجدية فى العمل .

ـــــــــــــــــــــــــــــــــــــــــــــــــــــــــــــــــــــــــــــــ

4 - المعارض :

الاتفاق مع مشاغل و مصانع ملابس على تبرعها لكميه من إنتاجها بشكل دوري و على كل جمعية توفير 20 كيس شهريا من الملابس على أن يتم اخذ 10 أكياس لصالح المؤسسة و تتعهد المؤسسة على غسل وكي وتخيط الملابس القابلة لإعادة الاستخدام و ستقوم بتكيسها .

5 –مركز ابحاث :

يعتمد مركز الابحاث على اساتذة بكلية الصيدله و اوائئل كليه الصيدله و يعمل هذا المركز على تطوير الدواء و استخراج و ابتكار انواع جديدة من الدواء و اختراع انواع جديدة من الدواء على ان يتم بيع الدواء الى الشركات الكبرى و التحكم فى تسعيرة الدواء .

ـــــــــــــــــــــــــــــــــــــــــــــــــــــــــــــــــــــــــــــــ

طرق الدعاية للمؤسسة :-

1) تغطية المسألة إعلاميا:

 أ) عبر الصحف المشهورة: تتم الاتصالات والعلاقات مع صحفيين من صحف مشهورة .

 ب) القنوات الإخبارية :- بما أن المؤسسة تتعامل مع هيئات حكومة ودولية فيتم دعوة ممثلين (شخصيات مرموقة ) من هذه الهيئات في الافتتاح وبالطبع سيتم التغطية الإعلامية للازمة .

جـ) عن طريق تكوين مجموعات على :-

* الفيس بوك ( Facebook ) .

* الهاي فيف (  HI 5) .

* الماي سبيس( Myspace ) .

* وعن طريق المجموعات البريدية في كلا من ال ( Yahoo , Hotmail ) وإرسال كل جديد عن المؤسسة والقوافل و التوعية .

* و عن طريق راديو صوتكم و لنك للمؤسسة داخل المنتديات المتعلقة بالجمعيات كـ ( صناع الحياة - رسالة ) .

د ) عن طريق تبرع بعض القنوات الفضائية الحيوية بدقيقه يوميا لعرض إعلان عن المؤسسة .

ه ) بالدعاية داخل الجمعيات عن طريق تعليق البوسترز بالمقرات .

ـــــــــــــــــــــــــــــــــــــــــــــــــــــ

2) عن طرق القوى البشرية :-

وذلك عن طريق الشباب الجامعي المتطوعين وذلك بترويج فكرة المؤسسة داخل الجامعات والمدارس ومابين الشباب وتقسيمهم على العمل في الظروف الطارئة إن لزم القوى البشرية .

أهم الوظائف و اللجان في المؤسسة المتفق عليها :

1 - المدير : هو الهيئة العليا في المؤسسة و هو من له جميع الصلاحيات .

2 - النائب : هو السلطة الثانية بعد المدير و يسند له كل الأعمال الإدارية و التنفيذية و له اتخاذ اى قرار مع ذكر سبب مرفق بتقرير .

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

اللجان :

لكل لجنة سيكون مسئول عنها:-

1 -  لجنة بنك الدم :-

- المسئول:- له جميع الصلاحيات في الموافقات دون الرجوع إلى الإدارة على أن يقدم تقرير إلى الإدارة أسبوعيا .

 - نائب المسئول :- يسند له الأعمال التنفيذية وله صلاحيات في غياب المسئول مع الرجوع للإدارة  .

- منسق مع وزارة الصحة :- هو الجهة التي تعمل على التنسيق مع وزارة الصحة على أماكن الحملات وعلى متابعة النسب المتفق عليها.

ـــــــــــــــــــــــــــــــــــــــــــــــــــــ

2 -  لجنة الأدوية و عينيه (ملابس , بطاطين) :-

- المسئول :- له جميع الصلاحيات دون الرجوع للإدارة مع مراجعة أعمال النائب .

- النائب :-  له صلاحيات في غياب المسئول مع الرجوع للإدارة و ذكر السبب ومراجعة أعمال المجرد .

- المجرد :- مسؤولية المجرد هو جرد كلا من الملابس والبطاطين والأدوية وتقييدهم في الملفات اللازمة .

ـــــــــــــــــــــــــــــــــــــــــــــــــــــ

3 - لجنة مادية :

- المسئول (مدير الحسابات ):- العمل على إيجاد طرق تطوير المؤسسة وله إدارة الأعمال الحسابية .

- نائب مدير الحسابات :- تقدير المبالغ المحولة للمؤسسة مع إدارة الميزانية الربع سنوية .

4 - لجنة تصنيع أدوية :

- المسئول (مسئول الصيادلة ) :-  مسئول الصيادلة هو دكتور من كلية الصيدلة وهو المسئول عن تصنيع الأدوية وتسند له الأعمال الورقية  .

- نائب مسئول الصيادلة :- هو المركز الثاني بعد كبير الصيادلة وهو دكتور من كلية الصيدلة وله المتابعة التنفيذية .

- مسئول وزارة الصحة :-  هو السلطة الوحيدة التي لها جميع الصلاحيات وله الحق في توقيف إنتاج نوع من الدواء مع تقديم تقرير مرفق به أسباب التوقيف.

ـــــــــــــــــــــــــــــــــــــــــــــــــــــ

5 - لجنة تنسيق القوافل :-

- منسق قوافل :- (المسئول ):- هو المسئول عن متابعة التقارير وتنسيق العمل المكتبي ومراجعة عمل النائب وله الحق في إلغاء أو تأجيل بعض القوافل.

- نائب المسئول :- هو المسئول عن متابعة الجمعيات عن طريق الاتصال بهم وله بعض الصلاحيات مع مراجعة الإدارة .

ـــــــــــــــــــــــــــــــــــــــــــــــــــــــــــــــــــــــــــــــ

بعض النظم المتبعة في المؤسسة :

1 - سيتم دفع مرتبات لضمان الجدية في العمل مع تفاوت المرتبات وذلك نظرا للترتيب التالي:-

1 ) الصيادلة :- لأنهم أكثر الموظفين عملا لتعاملهم مع كميات كبيرة من الدواء ونظراً لأنهم متخصصين في عملهم .

2 ) الإداريين :-

أ ) المسئولين :-  لأنهم السلطة العليا في المؤسسة و سيتحملون على عاتقهم أي خطأ أو تقصير قد صدر أو بدر من أي موظف تحت إشرافهم .

ب ) الموظفين :- (الريسبشن – المحاسبين – السكرتارية ...... الخ ) .

3 ) الخياطين :-   هم من يشرفون على تخيط وكي الملابس .

 4 ) عمال:-  يشرفون على نظافة المؤسسة وتكيس الملابس وغسل الملابس .

ـــــــــــــــــــــــــــــــــــــــــــــــــــــ

2- خطة التقييم الدوري:-

 لكل موظف تكون من خلال التقييم الجماعي من درجة معينة واخذ متوسط النقاط لتحري الصدق والدقة و الشفافية وتفعيل العمل الجماعي.

                                                                   ـــــــــــــــــــــــــــــــــــــــــــــــــــــ

                                                                                     

3 - على كل جمعية موافاة المؤسسة بتقارير كتابية مفصلة عن القوافل والتوعية مع إرفاق التالي :-

1 ) ثلاث بحوث حالة لثلاث قرى مع اختيار القرية الأكثر حاجه وفقرا مع إرفاق سبب اختيار القرية .

2 ) عدد المرضى :- ذكر عدد تذاكر المرضى .

3 ) عدد تذاكر :-  ذكر عدد تذاكر الصيدلية وإحصائيات لأكثر الأدوية طلباً بتخصصاتها .

4 ) صور :-  صور للقوافل تتضمن (صور الصيدلية – صور للعيادات – صور تحميل وتفريغ الأدوية ) .

5 ) تذاكر التحاليل  :-  ذكر عدد تذاكر التحاليل مع ذكر كل تحليل .

6 ) إرفاق جدول إحصائيات الأمراض .

ـــــــــــــــــــــــــــــــــــــــــــــــــــــ

4 - توفير نظام مراقبة وحراسات داخل المنشأة :-

عن طريق وضع كاميرات مراقبة داخل الأقسام وخاصة الصيدلية ومخازن الملابس لتحري الدقة وسيتم وضع حراسات على المؤسسة .

5 - إنشاء قاعدة بيانات على الانترنت :

لكل جمعية مشتركة مع المؤسسة لها حساب ورقم سري خاص على هذا الموقع ومن خلال ذلك ستوافيننا الجمعيات بصور من القوافل والتوعية وأبحاث الحالة للقرى وإحصائيات عن الأمراض في القرى وعدد المرضى وعدد تذاكر التحاليل وعدد تذاكر الصيدلية حتى يتسنى للمؤسسات الدولية كاليونيسيف والـ WHO أن تتابع ما يحدث نتيجة التنسيق مابين المؤسسة والجمعيات , وستتضمن قاعدة البيانات هذه إحصائيات عن الأمراض في القرى المصرية .

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

 طرق التبرع من خلال الهلال الأحمر ووزارة الصحة :-

سيتم تزويد المؤسسة بعدد (10 ) شاشات بلازما لعرض الإعلانات للشركات الراعية للمؤسسة وطرق التبرعات ستكون تقديم هذه المؤسسات للأدوية التي ستنتهي مدة صلاحيتها خلال الستة شهور وذلك لتصريفها في المناطق الحيوية التي يمكن صرف هذه الكمية بشكل سريع عن طريق القوافل .

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

خصائص المبنى و شكله :

لقد أجرينا بعض الاستشارات الهندسية حول شكل و خصائص المبنى و أكد المتخصصون على معاينة الموقع أولا قبل الإدلاء بأي استشارة .

ـــــــــــــــــــــــــــــــــــــــــــــــــــــــــــــــــــــــــــــــ

أقسام المبنى :

1 - مكاتب إداريه : يكون خاص بالمسئولين و النواب .

ـــــــــــــــــــــــــــــــــــــــــــــــــــــ

2- المكاتب  : خاص بـ (محاسبه - سكرتارية - رسبشن .... الخ ) .

ـــــــــــــــــــــــــــــــــــــــــــــــــــــ

3- الصيدلية : يتكون من مكتب إداري و هو للمسئولين و صيادلة لمقابلة المندوبين بها .

ـــــــــــــــــــــــــــــــــــــــــــــــــــــ

4- المطبعة : طبع الفلايرز و البرشورز للتوعية و خطابات تضامن و كل ما يلزم طباعته .

ـــــــــــــــــــــــــــــــــــــــــــــــــــــ

5- قاعة الاجتماعات : يتم فيها عقد اجتماعات بشكل دوري  للمسئولين كل أسبوعين و للجمعيات كل 3 أشهر لمناقشة التطورات .

ـــــــــــــــــــــــــــــــــــــــــــــــــــــ

6- معمل الأبحاث : للتحسين من جودة و طريقه تصنيع الدواء .

ـــــــــــــــــــــــــــــــــــــــــــــــــــــ

7 - معمل أدويه : تصنيع الدواء الخاص بالقوافل .

ـــــــــــــــــــــــــــــــــــــــــــــــــــــ

8 - قاعة غداء : مطعم لغداء الموظفين .

ـــــــــــــــــــــــــــــــــــــــــــــــــــــ

9 - مخزن : لتخزين الدواء و الملابس .

ـــــــــــــــــــــــــــــــــــــــــــــــــــــ

10 - ساحة : لكوى و تكيس و غسيل الملابس .

ـــــــــــــــــــــــــــــــــــــــــــــــــــــ

11- جراج : لركن سيارات المؤسسة .