بسم الله الرحمن الرحيم
السلام عليكم و رحمة الله و بركاتة
الصلاة و السلام على سيدنا محمد عليه افضل الصلاة و ازكى التسليم
فكره النهردة هى صدقه جاريه عن طريق المياة
على فكره فكره النهردة سهله جدا و بجد ثوابها كويس اوى لاننا هنعمل حاجة زى كولدير للماية الناس تشرب منه و كل اللى يشرب منه ربنا هيدينا ثواب عليه ان شاء الله
على فكرة الادوات اللى احنا محتاجنها عشان الموضوع دا هى مش هتتعدى 30 جنيه , عاوزين برميل من اللى لونه ازرق الكبير دا انا فاكر ان كان سعره حوالى 12 جنبه و كبايه و فير حرارى و لو مش لقيته هات ورق سوليفان و فلين
المهم هتروح لافف البرميل الاول بورق سوليفان و تحط عليه الفلين و تحط عليه طبقة ورقه سوليفان كمان و هنعرف احنا بنقول الموضوع دا ليه و نربطه او نلزقه جامد و طبعا نحط حنافيه ( صنبور ) امال هنشرب ازاى
المهم احنا هنحط البرميل دا قدام مكان مزدحم سواء كان سوق ولا محل ولا بيت ولا محطه ( زى ما بتوع الاقتصاد بيقولوا - منطقه حيويه - ) بس طبعا بعد ما نستأذن الناس المسؤوله عن الموقع عشان الاستفادة تبقى اكبر
هنملى البرميل ميه و هنجيب لوح تلج اللى بيستخدمه بتوع التمر الهندى و العرقسوس تمن اللوح دا من 2 لـ 4 جنيه كل يوم و موضوع السوليفان دا عشان التلج ميسحش بسرعه و تحفظ درجه حراره الميه
شوف بقى كام واحد هيشرب منه و هتاخد ثواب كام واحد و على فكره انا قولت موضوع البرميل دا عشان انا عارف ان موضوع الكولدير دا بجد غالى على ناس كتير يعنى بيبدأ من 900 جنية لحد 1600 جنيه بس الموضوع دا موفر جدا يعنى 30 جنيه و 3 جنيه فى اليوم عشان ناس كتير تعمله ان شاء الله
نصيحه اليوم : كونك كسلحفاء فى طريق الخير افضل بكثير من كونك غزال فى طريق الشر
و كالعادة خلوا نيتكوا لله وحده و صلوا على النيى 10 مرات الصلاه الابراهميه ( الجزء التانى من التشهد ) و ادعولى
و السلام مسك الختام
السلام عليكم و رحمة الله و بركاتة
و الصلاة و السلام على سيدنا محمد و عليه افضل الصلاة و ازكى التسليم
No comments:
Post a Comment
اكتب تعلقك هنا